Jóhanna ræðir við erlenda fréttamenn

Jóhanna Sigurðardóttir forsætisráðherra segir enga leynd hafa hvílt yfir fundi hennar með José Manuel Barroso forseta framkvæmdastjórnar Evrópusambandsins í Brussel í morgun. Til hafi staðið að hún fundaði með honum á loftlagsráðstefnunni í Kaupmannahöfn í desember en af því hafi ekki getað orðið. Þá hafi verið ákveðið að fundurinn yrði í febrúar og frá því greint á sínum tíma. Það hafi einnig komið fram í fjölmiðlum á Íslandi á þriðjudag að hún væri að fara til þessa fundar.

„Ég var rétt í þessu að ræða við erlendan fjölmiðil," sagði Jóhanna í samtali við fréttastofu rétt eftir fundinn með Barroso. Það væri því rangt að hún ætlaði ekki að ræða við erlenda fjölmiðla í Brussel.

Á Alþingi í morgun sagði Vigdís Hauksdóttir þingmaður Framsóknarflokksins að forsætisráðherra hefði smánað þjóð sína með leynd yfir fundi hennar í Brussel. Það væru bara einræðisherrar í Asíu sem forðust fjölmiðla eins og forsætisráðherra Íslands ætlaði að gera. Undir þetta tók Guðlaugur Þór Þórðarson þingmaður Sjálfstæðisflokksins, en hann vísaði í viðtal við erlendan blaðamann sem héldi þessu fram.

Framkvæmdastjórn Evrópusambandsins ákveður hinn 24. febrúar næst komandi hvort Ísland er fullgilt umsóknarríki. Jóhanna segist bjartsýn eftir fundinn í morgunn með Barroso og Olle Rhen stækkunarstjóra sambandsins um að umsókn Íslands verði samþykkt. Fari svo verður hún endanlega tekinn fyrir á fundi framkvæmdastjórnarinnar í mars.