Ögmundur sakar seðlabankastjóra um að hóta þjóðinni

Ögmundur Jónasson, þingmaður Vinstri grænna, segir að með yfirlýsingum seðlabankastjóra um Icesavedeiluna sé Seðlabankinn að hafa í hótunum við þjóðina, að hún samþykki ekki þá Icesavesamninga sem liggja fyrir þá skuli hún hafa verra af.

Seðlabankinn lækkaði stýrivexti í 0,5 prósentustig í gær og eru stýrivextir bankans nú 9,5%. Már Guðmundsson, seðlabankastjóri, sagði í gær að stýrivextir hefðu lækkað meira ef Icesave-deilan hefði verið leyst og efnahagsáætlun Alþjóðagjaldeyrissjóðsins hefði þar með náð fram að ganga. Dragist deilan á langinn geti það seinkað efnahagsbata í þjóðfélaginu eins og seinkun stórframkvæmda hefur einnig gert.

Ögmundur Jónasson, þingmaður Vinstri grænna, var gestur í þættinum Í bítið á Bylgjunni í morgun. Þar gagnrýndi hann yfirlýsingar seðlabankastjóra.

Ögmundur sagðist hafa áhyggjur af því að Seðlabankinn væri að blanda sér í þessa stórpólitísku deilu sem upp er komin sem er Icesavemálið. Bankinn hafi í hótunum við þjóðina, að ef hún samþykki ekki þá Icesavesamninga sem nú liggja fyrir þá skuli hún hafa verra af.