Mörg lönd með stórhuga áætlanir

Rafmagnsbíllinn virðist loks í þann mund að ná fótfestu, segir í nýrri umfjöllun á vef Umhverfisstofnunar Evrópu. Þar segir að kostir rafbíla séu ótvíræðir með tilliti til umhverfisins, sér í lagi í þéttbýli.

„Á leiðinni eru nýjar tegundir bíla sem ýta ættu undir góðar móttökur neytenda og brjóta á bak aftur þær hömlur sem enn eru til staðar, svo sem mikinn kostnað við rafhlöður, framboð á vistvænni raforku og uppbyggingu hleðslustöðva," segir á vef stofnunarinnar, en þar kemur jafnframt fram að nokkur Evrópulönd, auk Bandaríkjanna, Japans, Kína og annarra landa, hafi þegar kynnt stórhuga áætlanir um innleiðingu rafknúinna farartækja.

Félag íslenskra bifreiðaeigenda segir hins vegar að „mjög hátt verð" á líþíumrafgeymum í rafbíla og óvissa um endingu þeirra sé sá þröskuldur sem bílakaupendur eigi erfiðast með að yfirstíga.

„Ólíklegt þykir að verðið lækki nóg næsta áratuginn til þess að hreinir rafbílar verði almenningseign, nema þ­ví aðeins að einhvers konar stökkbreyting verði í rafgeymatækninni," segir í nýrri frétt á vef samtakanna og vísað í að það sé meginniðurstaða nýrrar rannsóknar sem unnin hafi verið af Boston Consulting Group (BCG). - óká