Yfirmenn lögreglunnar féllu á prófinu

Ráðist var á Björgvin Björgvinsson, fyrrverandi yfirmann kynferðisbrotadeildar lögreglunnar á höfuðborgarsvæðinu, af miklu ofstæki eftir að hann tjáði sig um kynferðisbrotamál í DV á dögunum. Þetta segir Brynjar Níelsson, formaður Lögmannafélags Íslands í pistli á Pressunni.

„Lögreglumaðurinn var einungis að hvetja til þess að fólk forðaðist að setja sjálft sig í aðstöðu þar sem meiri hætta væri á að brotið yrði gegn því. Menn ættu að fagna slíkri hvatningu frá lögreglumanni sem áreiðanlega veit vel hvað hann er að tala um. Það er fjarstæða að telja hann hafa gefið í skyn að óábyrg hegðun fórnarlambs að þessu leyti réttlætti nauðgunina. Hann var aðeins að vara fólk við. Svona rétt eins og lögregla varar fasteignaeigendur við innbrotum í hús og hvetur þá til að setja upp öryggiskerfi. Í því felst auðvitað engin réttlæting fyrir innbrotum," segir Brynjar Níelsson í pistli sínum.

Brynjar segir að fókið sem fari fram með ásakanir eins og Björgvin mátti þola sé varhugavert. „Það fer fram með hávaða og klisjur og leitar að tilefnum til að sýna mátt sinn og megin í umræðum samfélagsins. Það ræðst að mönnum fyrir að tjá skoðanir sínar og hikar ekki við að snúa út úr því sem sagt er ef það telur slíkt þjóna rétttrúnaðinum," segir Brynjar, sem telur að þetta fólk sé hættulegt tjáningarfrelsinu. Það bæli umræðurnar niður og nýti oft til þess fulltingis skynsnauðra fjölmiðlamanna sem éti vitleysuna upp.

Þá segir Brynjar að yfirmenn lögreglunnar hafi fallið á þessu prófi. „Þeir eru lafhræddir við rétttrúnaðarfólkið og Björgvin var því fluttur til í starfi," segir Brynjar.