Prófmál um gengistryggðu lánin flutt fyrir dómi í dag

Prófmál um uppgjörsvexti gengistryggðra lána var flutt fyrir héraðsdómi Reykjavíkur nú í morgun. Búast má við niðurstöðu í málinu eftir mánuð. Fjármögnunarfyrirtækið Lýsing vill að myntkörfulán verði uppreiknað miðað við verðtryggða vexti.

Stefnandi málsins er fjármögnunarfyrirtækið Lýsing, en það höfðar málið á hendur skuldara vegna vanskila dæmigerðs gengistryggðs bílaláns, tekið árið 2007.

Í málinu er ágreiningur um þá vexti sem notaðir verða við uppgjör lánsins eftir að gengistrygging bílalána var dæmd ólögmæt.

Um tugur áhorfenda og fjölmiðlamanna fylgdist með málflutningnum, enda má öruggt telja að niðurstaða þess muni ráða úrslitum um hvernig sambærileg lán verða gerð upp.

Aðalkrafa Lýsingar í málinu er að lánið verði uppreiknað miðað við verðtryggingu og verðtryggað vexti samkvæmt gjaldskrá fyrirtækisins, en það er nokkru hærri krafa en felst í nýlegum tilmælum eftirlitsstofnana til fjármálafyrirtækja. Varakröfur fyrirtækisins eru nokkrar; að miðað verði við verðtryggingu og vexti Seðlabankans, óverðtryggða vexti Lýsingar, svokallaða Reibor millibankavexti eða óverðtryggða vexti Seðlabankans.

Sigurmar K. Albertsson, lögmaður Lýsingar, segist telja að fyrst gengistryggingin hafi verið dæmd ólögmæt séu forsendur fyrir hinum lágu erlendu samningsvöxtum brostnar, og færa þurfi önnur ákvæði samningsins til jafns við venjuleg íslensk lán.

Hann segir málið alvarlegt og ræddi um höggið sem kæmi á fjármálafyrirtæki ef allir gengistryggðir samningar yrðu dæmdir ólöglegir og myndu áfram bera hina lágu vexti, sem hann heldur fram að muni nema 300 milljörðum.

Jóhannes Árnason, verjandi skuldarans, segir hins vegar að dómstólar geti ekki horft á stöðu fjármálakerfis eða ríkissjóðs heldur verði einfaldlega að huga að þeim lögum sem við eiga í málinu. Hann segir engar lagalegar heimildir hníga að því að breyta skilmálum lánsins eftir á og að málið sé tilraun til að velta ábyrgð af ólöglegum samningum yfir á neytendur með aðstoð dómstóla.

Aðalmeðferð málsins tók rúman einn og hálfan tíma og lauk um tíu mínútum fyrir ellefu í morgun. Lög um meðferð einkamála gera ráð fyrir að dómstólar komist að niðurstöðu í vaxtamálinu innan fjögurra vikna.