Fjárhagsvandanum ekki reddað með tattúi og bleikum jakkafötum

Reykjavíkurborg þarf að greiða tvö hundruð milljónum króna meira á ári í rafmagn og hita vegna gjaldskrárhækkana Orkuveitunnar. Þetta jafngildir rekstri tveggja meðalstórra leikskóla í Reykjavík. Borgarfulltrúi segir að vandi borgarsjóðs verði ekki leystur með bleikum jakkafötum og tattúum.

Gjaldskrárhækkanirnar hjá OR bitna því ekki aðeins á reykvískum fjölskyldum og fyrirtækjum því embættismenn borgarinnar hafa nú reiknað út að gjaldskrárhækkanirnar hækki útgjöld borgarsjóðs um tvö hundruð milljónir króna á ári. Þetta eru peningar sem fara í raun úr einum vasa í annan, því borgin á Orkuveituna. Hins vegar er fyrirtækið dótturfélag í svokölluðum b-hluta, meðan rekstur almannaþjónustu er í a-hluta. Borgin hefur líka misst spón úr aski sínum af öðrum ástæðum því tekin var ákvörðun á aðalfundi OR að greiða ekki út arð til borgarinnar sem eiganda.

En hvaðan eiga peningarnir að koma? Júlíus Vífill Ingvarsson, borgarfulltrúi Sjálfstæðisflokksins og fyrrverandi stjórnarmaður í OR, segir að gjaldskrárhækkun fyrirtækisins hafi verið vanhugsuð. „Það er augljóst að það þarf að gera ráð fyrir þessari útgjaldaaukningu með einhverjum hætti, með takmarkaðri þjónustu væntanlega. Ég bendi á það t.d að fyrir þessa peninga má reka tvo leikskóla, eða jafnvel þrjá í heilt ár," segir Júlíus Vífill.

Athugun á ársreikningum leikskólasviðs Reykjavíkurborgar staðfesti þessi orð Júlíusar Vífils því hún leiddi ljós að langflestir leikskólar í borginni eru reknir fyrir umtalsvert lægri fjárhæð, nokkuð undir hundrað milljónum. Júlíus Vífill segir að forsvarsmenn meirihlutans hafi ekki gefið svör við því hvernig eigi að mæta þessum útgjöldum borgarsjóðs. „Nú er setið yfir fjárhagsáætlanagerð vegna næsta árs sem er gríðarlega erfitt verkefni og henni verður ekki reddað fyrir horn með tattúum og bleikum jakkafötum," segir Júlíus Vífill.

S. Björn Blöndal, aðstoðarmaður borgarstjóra, sagði í samtali við fréttastofu í dag að gjaldskrárhækkanir OR hefðu verið nauðsynlegar, enginn gæti haldið öðru fram. S. Björn sagði að tenging gjaldskrárhækkana við hugsanlega þjónustuskerðingu væri skrípaleikur. Staða borgarinnar væri erfið, en verið væri að nýta þá peninga sem væru til eins vel og hægt er.