Fundað um Icesave í Hollandi

Samninganefndir Íslendinga, Breta og Hollendinga hittust í Hollandi í dag til að ræða Icesave-málið. Rósa Björk Brynjólfsdóttir upplýsingafulltrúi fjármálaráðuneytisins segir í samtali við Reuters að til standi að funda í dag og á morgun.

Kollegi hennar hjá hollenska fjármálaráðuneytinu segir á sama stað að viðræðurnar séu á milli starfsmanna ráðuneytanna en ekki á milli stjórnmálamanna og að Hollendingar vinni enn að því að komast að „sanngjörnu" samkomulagi, eins og hann orðaði það.

Síðast var fundað vegna málsins í júlí án þess að þeir fundir hafi skilað niðurstöðu en eins og bent er á í frétt Reuters gæti málið tafið fyrir mögulegri inngöngu Íslands í Evrópusambandið.