Handtók tvo timburþjófa

Lögreglan á höfuðborgarsvæðinu handtók tvo unga menn í portinu á bak við Bykó í Kauptúni í Garðabæ í nótt, þar sem þeir voru að stela timbri og setja á kerru, sem tengd var við stóran jeppa þeirra.

Af ótta við eftirlitsmyndavélar, höfðu þeir stolið númeraplötum af öðrum bíl og sett á jeppann. Þeir voru hinsvegar ódrukknir og stóð einbeittur brotavilji þeirra til þess, að stela ákveðnu timbri, sem hentaði undir milliloft í húsnæði, sem þeir eru að innrétta.

Ekkert varð úr smíðamennsku í nótt, því lögregla vistar þá í fangageymslum og ætlar að ræða nánar við þá í dag.-