Hafa greitt of mikið í laun og rekstur

Fjárhaldsstjórn Álftaness hefur gert nýja fjárhagsáætlun fyrir sveitarfélagið þar sem gengið er út frá verulega auknum sparnaði á næstu árum frá því sem sveitarfélagið sjálft og endurskoðunarskrifstofan KPMG gerðu ráð fyrir í janúar.

Drög að greinargerð með nýju áætluninni voru lögð fram í bæjarstjórn Álftaness á síðasta fundi fyrir kosningar. „Þegar rekstur Sveitarfélagsins Álftaness er skoðaður er einkum tvennt sem sker sig úr í samanburði við önnur sveitarfélög á höfuðborgarsvæðinu. Annars vegar mjög mikill launakostnaður sveitarfélagsins, sem hefur farið vaxandi milli ára, og hins vegar mikill rekstrarkostnaður grunn- og leikskóla,“ segir í drögunum.

Fjárhaldsstjórnin segir að á árinu 2008 hafi launakostnaður sem hlutfall af tekjum verið 65,5 prósent á Álftanesi. Sama hlutfall hafi verið 49,3 prósent hjá öðrum sveitarfélögum á höfuðborgarsvæðinu á þessum tíma. Hlutfallið náði hámarki á Álftanesi árið 2009 þegar það fór upp í 72,2 prósent. Í nýrri áætlun fjárhaldsstjórnarinnar á hlutfall launakostnaðar af tekjum að verða komið niður í 52,7 prósent á árinu 2012. Það er sama hlutfall og var árið 2004.

Fjárhaldsstjórnin segir að nokkuð hafi verið um launagreiðslur umfram kjarasamninga á Álftanesi. Sérstaklega eru nefnd dæmi um óvanalega miklar greiðslur fyrir yfirvinnu á leiksskólum og tvöfalt hærri greiðslur fyrir ræstingu leikskólanna en ný uppmæling segi til um.

Um háan rekstrarkostnað skólanna á Álftanesi segir að sem hlutfall af skatttekjum hafi hann verið 60,5 prósent á Álftanesi miðað við 43,5 prósent í nágrannasveitar­félögunum. Framtíðarskuldbindingar Álftaness við Eignarhaldsfélagið Fasteign, Búmenn hsf. og Ris ehf. eru virtar á 4.066 milljónir króna. 10 prósent álag á útsvar og 0,4 prósent fasteignaskattur þurfi að vera í gildi fram yfir árið 2015 eigi Álftanesi að takast að mynda einhvern afgang til að standa undir leigugreiðslum sveitarfélagsins. Auk þess verði að hagræða meira í rekstrinum. Það sé mat fjárhaldsstjórnarinnar að hægt sé að ná fram þeim rekstrarbata án þess að skerða frekar þjónustu en þegar hafi verið gert í sveitarfélaginu.

gar@frettabladid.is