Biðlistar lengjast að óbreyttu

Oddný Sturludóttir, borgarfulltrúi Samfylkingarinnar og fulltrúi í leikskólaráði, telur víst að biðlistar eftir leikskólavist hjá Reykjavíkurborg muni lengjast mikið á næstu mánuðum vegna þeirrar ákvörðunar að breyta innritunarreglum við gerð fjárhagsáætlunar fyrir árið 2010. Breyttar reglur gera ekki ráð fyrir að ný börn séu tekin inn í leikskólana fyrr en í haust, að hennar sögn. Því megi ljóst vera að bið barnafólks eftir leikskólaplássi lengist.

„Það er alveg á hreinu að þessi 130 börn sem nú bíða verða orðin fleiri hundruð þegar kemur fram á sumarið," segir Oddný. Hún bendir á að árið 2010 verði í Reykjavík 1.791 barn eins árs og 1.658 nái þá tveggja ára aldri.

Oddný lagði fram fyrirspurn á fundi leikskólaráðs á miðvikudag og spurði hvort meirihlutinn hygðist endurskoða þá ákvörðun að seinka innritun leikskólabarna fram yfir sumarleyfi starfsfólks í hagræðingarskyni.

Í fyrirspurninni segir að gjörbreytt staða sé að koma upp sem sjáist á að dagforeldrar anni vart eftirspurn öfugt við það sem var síðla síðasta árs þegar meirihluta dagforeldra vantaði börn í vistun.

- shá