Bað þjóðina afsökunar á sjónarspili

Þráinn Bertelsson, óháður þingmaður, bað þjóðina afsökunar á því að vera þátttakandi í því dapurlega sjónarspili sem fram hafi farið á Alþingi í gær. Þingið komist ekki úr hjólförum haturs og gagnkvæmra ásakana.

Stjórnmálaflokkarnir séu að festa þjóðina í mykjuhaug og staðfesta eigið getuleysi til að bjarga þjóðinni úr ógöngum sem þeir hafi sjálfir komið henni í.

Tilefni þessarar yfirlýsingar Þráins voru hörð orðaskipti þingmanna við upphaf þingfundar. Þau hófust þegar Björn Valur Gíslason, VG, krafði Sigurð Kára Kristjánsson, Sjálfstæðisflokki, svara um hvort hann tengdist á einhvern hátt eða hefði þegið greiðslur frá bresku lögfræðistofunni Mishcon de Reya, en sú fékk 22 milljónir króna greiddar frá Alþingi vegna vinnu við Icesave-málið.

Sigurður Kári sagði svívirðilega aðdróttun felast í orðum Björns Vals. Tengsl sín við þessa stofu væru engin: „Ég skil ekki af hverju íslensk stjórnmál þurfa að vera komin niður á það plan sem [Björn Valur Gíslason] hefur dregið þau niður á," sagði Sigurður Kári. Það væri bæði Birni Val og flokki hans til skammar að fara fram með þessar ásakanir. „Hann ætti að skammast sín og biðjast afsökunar," sagði Sigurður Kári.

Nokkrir þingmenn úr stjórnarandstöðu fóru hörðum og reiðilegum orðum um framgöngu Björns Vals. Fleiri en Þráinn hörmuðu þá umræðusiði sem tíðkast nú á Alþingi. Var þess krafist að forseti þingsins vítti Björn Val. Stjórnarliðar höfðu sig ekki í frammi. Árni Þór Sigurðsson, flokksbróðir Björns, sem sat á forsetastóli, gaf loks þá yfirlýsingu að hann hefði talið að um væri að ræða fyrirspurn Björns Vals til Sigurðar Kára og að ekki hefðu falist í henni dylgjur.

„Ef orð mín hafa misboðið háttvirtum þingmanni þá bið ég afsökunar á því," sagði Björn Valur þegar hann tók á ný til máls, „en þetta voru einfaldar spurningar og ég fékk við þeim svör, er ekki allt í lagi með það?"