Nýr eigandi Já: Eitt sterkasta vörumerki á Íslandi

„Allir Íslendingar þekkja Já og fyrirtækið nýtur mikils trausts og tryggðar viðskiptavina sinna. Já er jafnframt eitt sterkasta vörumerki á Íslandi. Þetta teljum við að geri fyrirtækið að góðum fjárfestingarkosti. Okkur finnst það spennandi verkefni að vinna með starfsmönnum að því á næstu árum að veita sífellt betri þjónustu og ná enn meiri árangri í að veita fólki og fyrirtækjum áreiðanlegar og aðgengilegar upplýsingar með fjölbreyttum leiðum," segir Arna Harðardóttir, framkvæmdastjóri Auðar 1 fjárfestingasjóðs. Vísir greindi frá því fyrr í dag að Auður 1 hefði keypt Já af Skiptum.

Sigríður Margrét Oddsdóttir verður áfram framkvæmdastjóri Já og Katrín Olga Jóhannesdóttir verður stjórnarformaður félagsins. Þær hafa jafnframt keypt hlut í félaginu.

Sigríður Margrét segir þetta stór tímamót. „Félagið byggir á sterkum grunni og það er einlæg trú mín að nýir eigendur geri okkur kleift að halda áfram frábæru starfi, í góðu starfsumhverfi, með öflugu fólki. Ég bíð spennt eftir framtíðinni með mínu fólki."