Stærsta seglskip heims

Stærsta seglskip heims sótti Reykjavíkurhöfn heim klukkan níu í gærmorgun. Skipið ber nafnið Sedov og kemur frá Rússlandi og mun dvelja í Reykjavík fram til laugardags. Það er 120 metra langt og 15 metra breitt og verður þar með talið það stærsta í hópi seglskipa af eldri gerð. Hæstu masturstoppar skipsins eru 58 metrar.

Samkvæmt upplýsingum frá Faxaflóahöfnum er Sedov 89 ára, en það var smíðað í Þýskalandi árið 1921 hjá Krupp-skipasmíðastöðinni í Kiel. Fyrst um sinn var það notað til vöruflutninga en eftir seinni heimsstyrjöldina fór skipið til Rússlands. Sedov er skólaskip með 120 nemum, en áhöfnin er alls 240 manns. - sv