Kreppa áfram spýti ríkisstjórnin ekki í lófana

Mikið atvinnuleysi, léleg lífskjör og versnandi velferðarkerfi verða hlutskipti Íslendinga um langa framtíð nema ríkisstjórnin spýti í lófana, segja Samtök atvinnulífsins. Þau gagnrýna stjórnvöld harðlega fyrir dugleysi og rangar ákvarðanir og segja að fimm prósenta árlegan hagvöxt þurfi til að vinna þjóðina út úr kreppunni.

Forystumenn Samtaka atvinnulífsins hvetja til þess að blásið verði til sóknar í atvinnumálum og kynntu í því skyni í dag ítarlega áætlun um uppbyggingu atvinnulífsins. Þeir telja að aðgerðarleysi og rangar ákvarðanir stjórnvalda leiði til versnandi lífskjara, með atvinnuleysi, vaxandi halla á ríkissjóði og undanhaldi í velferðarkerfinu.

En svona þurfi þetta ekki að fara. Þeir telja að þjóðin geti náð aftur fyrri lífskjörum en þá dugi ekki markmið um tveggja prósenta árlegan hagvöxt.

Vilhjálmur Egilsson, framkvæmdastjóri Samtaka atvinnulífsins, segir að við verðum að spýta í lófa og auka fjárfestingarnar, fyrst og fremst í útflutningsgreinum, og ná fyrri lífskjörum til baka með fimm prósenta hagvexti á ári næstu fimm árin.

Þeir segja að innspýtingu þurfi í allan atvinnurekstur með vaxtalækkun. Það vanti dirfsku og ákveðni í ríkisstjórnina. Ekkert hafi ennþá gerst í því að koma opinberum framkvæmdum eins og vegagerð í gang. Ríkisstjórnin vinni jafnvel gegn meginmarkmiðum stöðugleikasáttmálans.

„Til dæmis umhverfisráðherrann, sem virðist vera á móti framförum," segir Vilhjálmur.

Þá segir hann gjaldeyrishöftin hamla gegn styrkingu krónunnar og kveðst þess fullviss að ef þau hefðu aldrei verið sett á væri gengi krónunnar hærra en það nú er.

Ríkisstjórnin kynnti í hádeginu það sem hún kallar „fjölþættar aðgerðir í atvinnumálum með áherslu á nýsköpun". Þar eru helstu nýmæli ákvörðun um að auka eigið fé Byggðastofnunar um 3,6 milljarða króna til atvinnuuppbyggingar og áform um allt að 700 milljóna skattlagningu á ferðamenn til að byggja upp ferðamannastaði.