Engin niðurstaða en ný fundalota boðuð

Fundi strandríkja um stjórnun makrílveiða lauk í London í gær án niðurstöðu. Önnur fundarlota er boðuð síðar í þessum mánuði. Bitbeinið er og verður hlutdeild strandríkjanna - Evrópusambandsins, Noregs, Færeyja og Íslands - í heildarveiði á makríl.

Tómas H. Heiðar, formaður samninganefndar Íslands í makrílviðræðunum, segir það ekki þurfa að koma neinum á óvart að niðurstaða hafi ekki fengist. Enginn hafi gert ráð fyrir því að deilan yrði leyst á þessum fundi, enda hafi það tekið ESB og Noreg mörg ár að viðurkenna stöðu Íslands sem strandríkis þrátt fyrir að fyrir lægju vísindalegar upplýsingar um að makríl væri að finna í íslenskri lögsögu í sívaxandi mæli. Þegar það væri haft hugfast væru vonir um skjótfengna niðurstöðu um skiptingu makrílkvóta á milli strandríkjanna fjögurra óraunhæfar.

Á fundinum var rætt um skiptingu makrílkvóta fyrir næstu ár. „Það er ekki ágreiningur um stjórnun makrílveiðanna í grundvallaratriðum. Allir eru sammála um að fylgja vísindalegri ráðgjöf ICES en menn greinir hins vegar á um hvernig á að skipta stofninum á milli strandríkjanna. Tekist er á um það," segir Tómas sem getur ekki upplýst hverjar kröfur Íslands eru eða hvað er í boði frá hendi ESB og Noregs. Hann segir að íslenska samninganefndin hafi lagt áherslu á að það sé sameiginleg ábyrgð allra strandríkjanna að sjá til þess að heildarveiðarnar úr stofninum verði sjálfbærar. Í því felist í raun að allir aðilar verði að draga úr sínum veiðum til að kröfum um sjálfbærar veiðar verði mætt.

Úr þessu má lesa að allar þjóðirnar verði að draga úr sínum veiðum jafnt, þar sem öll löndin hafa úthlutað sér kvóta einhliða. Makrílkvóti Íslendinga fyrir árið 2010 er 130 þúsund tonn, sem eru um sautján prósent af saman­lögðum kvótum allra ríkjanna. Því má gera ráð fyrir að íslenska samninganefndin fari fram á að Íslendingar fái sautján prósent af þeim heildarkvóta sem verður gefinn út samkvæmt veiðiráðgjöf ICES næstu árin. Tómas vill ekki tjá sig um þetta atriði, enda segir hann viðræðurnar á viðkvæmu stigi.

ESB hefur sent Íslendingum tóninn á undanförnum vikum. Ekki fer leynt að það er að undirlagi Skota, sem eiga mikilla hagsmuna að gæta. Spurður um samningsvilja úr þeirri átt segir Tómas að í opnunarávarpi sínu á fundinum hafi hann tekið skýrt fram að hótanir frá ESB væru ekki til að greiða fyrir lausn málsins, heldur þvert á móti.

svavar@frettabladid.is