Auðlindir þarf að skoða heildstætt

Katrín Júlíusdóttir iðnaðarráðherra segir að verja þurfi sameiginlegt eignarhald þjóðarinnar á auðlindum og tryggja áhrif ríkisins á hvernig orkunni sé ráðstafað. Þetta sagði hún á málþingi um orkumál í gær, en það var haldið af stýrihópi ráðuneytisins um mótun heildstæðrar orkustefnu.

Ráðherra sagði að skoða þyrfti auðlindamál heildstætt þar sem tekið væri jafnt á orkumálum sem og fiskistofnum og olíuvinnslu.

„Skýran lagaramma þarf utan um hvernig á að verja varanlegt eignarhald þjóðarinnar á sameiginlegum auðlindum sínum og hvernig við úthlutum nýtingarrétti gegn sanngjörnu afgjaldi,“ sagði Katrín.

Hún bætti því við að kostir fylgdu því að fá einkafjármagn inn í orkuvinnslu, hvort sem er innlent eða erlent, en ekki stæði til að selja orkufyrirtæki í eigu ríkisins.

Þá vildu stjórnvöld hafa áhrif á hvernig orku yrði ráðstafað. Í stað þess að ný og smærri verkefni þyrftu sífellt að mæta afgangi frá stóriðju vilja stjórnvöld stuðla að meiri fjölbreytni. Skilgreint verður hvers lags iðnaður sé fýsilegur og eftir það lagt kapp á að sækja slíkt til landsins. - þj