Stöðvaði stéttargerð með aðkomusteypu

Björn Steinar Pálmason bæjarstjóri stöðvaði í fyrradag steypuvinnu við endurnýjun á gangstéttum utan við bygginguna þar sem bæjarstjórnarskrifstofurnar í Grundarfirði eru til húsa.

„Ég var ekki að versla við réttu mennina, það var aðalástæðan,“ segir Þorkell Gunnar Þorkelsson, verktakinn sem varð fyrir því að framkvæmdir voru stöðvaðar í miðjum klíðum.

Að sögn Þorkels fór fyrir brjóstið á Birni Steinari bæjarstjóra að steypan sem verið var að nota var keypt á Rifi en ekki í Grundarfirði.

„Ég var nú bara að versla við minn viðskiptaaðila sem ég skipti almennt við. Hann er á Rifi sem er stutt hér frá,“ útskýrir Þorkell sem aðspurður kveður enga skilmála um steypukaup í Grundarfirði hafa fylgt með því verki sem hann tók að sér. Bæjarskrifstofurnar eru á Grundarstíg 30. Bærinn á um þriðjung hússins á móti Arion banka auk þess sem Þjónustustofan ehf. á tæp 6 prósent í húsinu. Verkið er unnið fyrir hönd allra þessara aðila sameiginlega. Þorkell segir að steypan sem þurfi í gangstéttina sé aðeins nokkrir rúmmetrar.

Þorkell gekk á fund Björns Steinars bæjarstjóra eftir hádegi í gær. Björn Steinar segir málið hafa verið leyst á þeim fundi.

„Þetta er bara búið. Sá sem er með verkið bara klárar verkið og útvegar meðal annars steypu,“ segir bæjarstjórinn um framhald málsins.

Björn Steinar vill ekki skýra hvers vegna hann hafi stöðvað framkvæmdina á miðvikudag. „Menn sáu hlutina bara aðeins ólíkt og ég hef ekkert meira um það að segja,“ segir bæjarstjórinn sem aðspurður hafnar því að hann hafi nokkur persónuleg tengsl við steypustöðina sem starfar í Grundarfirði. „Þetta snýst ekkert um það. Ég á enga ættingja hér eða tengist þessu á annan hátt.“

Að sögn Björns Steinars er verktakanum nú frjálst að nota þá steypu sem hann kýs til að ljúka verkinu. Aðeins þurfi um það bil einn steypubíl í verkið. „Það eru nú öll ósköpin. þetta er bara smámál.“

gar@frettabladid.is