Mikinn gufustrók leggur upp af Eyjafjallajökli

Mikinn gufustrók leggur upp frá eldstöðinni í Eyjafjallajökli og nær hann upp í níu þúsund fet, eða þrjá kílómetra og sést víða að.

Að sögn Veðurstofunnar mælast engir skjálftar eða eldvirkni í eldstöðinni, þannig að þetta er bara gufa, sem veit ekki á eldsumbrot. Strókurinn er þó öflugri en undanfarið, en veðurfarsskilyrði kunna að valda því.

Strókurinn sést vel frá Selfossi en einn bæjarbúa þar segir að strókurinn hafi byrjað að myndast um sex leytið í morgun og hafa stöðugt farið vaxandi síðan þá.

Annar einstaklingur sem staddur er í Grímsnesi segir að strókurinn sé dökkur í toppinn og að efsti hluti jökulsins sé nú hulinn gufunni.