Fjórar stórar áramótabrennur í Reykjavík

Reykjavíkurborg gerir ráð fyrir því að söfnun á borgarbrennur hefjist á morgun. „Best er að fá hreint timbur og bretti á brennurnar," segir Þorgrímur Hallgrímsson, rekstrarstjóri á hverfastöð Framkvæmda- og eignasviðs, á vef Reykjavíkurborgar.

Hætt verður að taka á móti efni þegar þær eru orðnar hæfilega stórar eða í síðasta lagi klukkan tólf á hádegi á gamlársdag.

Starfsmenn hverfastöðvanna verða á vettvangi og leiðbeina þeim sem koma með efni. „Plast, gúmmí og unnið timbur á ekki erindi á brennurnar," segir Þorgrímur.

Áramótabrennurnar verða á sömu stöðum og í fyrra, fjórar stórar og fimm minni. Þær eru misstórar og ræðst stærð þeirra af aðstæðum á hverjum stað, en Eldvarnareftirlitið ákvarðar um það.

Hægt er að sjá brennurnar á myndinni sem fylgir fréttinni. En hægt er að sjá hana stærri með því að smella á hana.

Á listanum hér fyrir neðan eru fyrstu sex svokallaðar borgarbrennur í umsjá Framkvæmda- og eignasviðs Reykjavíkurborgar.

1. Við Ægisíðu,  stór brenna.

2. Við Suðurhlíðar, neðan við Fossvogskirkjugarð,  lítil brenna.

3. Geirsnef, stór brenna.

4. Við Suðurfell,  lítil brenna.

5. Gufunes við gömlu öskuhaugana, stór brenna.

6. Kléberg á Kjalarnesi, lítil brenna.

7. Skerjafjörður gegnt Skildinganesi 48 - 52,  lítil brenna.

8. Vestan Laugarásvegar móts við Valbjarnarvöll,  lítil brenna.

9. Fylkisbrennan, við Rauðavatn,  stór brenna.