Um 100 þúsund ónotaðir skammtar af bóluefni

Um eitt hundrað þúsund skammtar af bóluefni gegn svínaflensu eru ónotaðir hér á landi. Sóttvarnarlæknir áætlar að beinn kostnaður vegna aðgerða tengdum flensunni sé rúmlega hálfur milljarður króna. Þær aðgerðir sem gripið var til hafi dregið úr faraldrinum.

Efnaðri þjóðir kepptust við að tryggja sér bólefni eftir svínaflensufaraldurinn fór að breiðast út síðasta vor. Nú er svo komið að sumar þeirra sitja uppi með töluvert magn af ónotuðu bóluefni. Þannig pöntuðu Frakkar nítíu og fjórar milljónir skammta af bóluefninu þrátt fyrir að landsmenn séu aðeins sextíu og fimm milljónir. Þeir reyna nú að selja um fimmtíu milljón skammta af bóluefninu.

Upphaflega var talið að bólusetja þyrfti hvern einstakling tvisvar sinnu. Síðar kom í ljós að eitt skipti var nóg. Um þrjú hundruð þúsund skammtar voru keyptir af bóluefninu hingað til lands en um eitt hundrað þúsund eru eftir af þeim. Haraldur Briem sóttvarnarlæknir segir Íslendinga í annarri stöðu en margar aðrar þjóðir þar sem þær hafi keypt töluvert af umframbirgðum en það hafi Íslendingar ekki gert. Það bóluefni sem eftir er verður notað áfram enda bólusetning enn í gangi og segir Haraldur ekki útilokað að önnur bylgja flensunnar eigi eftir að ganga yfir.

Haraldur segir erfitt að meta hver kostnaður hafi verið vegna þeirra aðgerða sem gripið var til hér á landi, svo sem kaup á bóluefni, lyfjum og hlífðarbúnaði. Hann telji að beinn kostnaður sé um hálfur milljarður króna. Hann telur að þær aðgerðir sem gripið var til hafi dregið úr flensunni. Þær hafi ekki verið of miklar þar sem faraldurinn hafi verið töluverður skellur. Hér á landi veiktust um fimmtíu og fimm þúsund manns. Um tvö hundruð manns voru lagðir inn á spítala og um tuttugu á gjörgæslu.