Lögbann á torrent.is staðfest

Hæstiréttur staðfesti í dag lögbann sýslumannsins í Hafnarfirði á rekstri vefsíðunnar torrent.is, en á síðunni var höfundarvörðu efni, svo sem tónlist og myndböndum dreift um netið.

Sýslumaðurinn í Hafnarfirði lagði lögbann við rekstri síðunnar þann 19. nóvember 2007. Stef höfðaði mál í hitteðfyrra og krafðist þess meðal annars að lögbannið yrði staðfest með dómi og viðurkennd yrði bótaskylda Istorrent og Svavars Lútherssonar eiganda síðunnar.

Nú hafa Héraðsdómur Reykjaness og Hæstiréttur Íslands staðfest lögbann sýslumanns.