Ökumenn virða ekki gangbrautarrétt

Það virðist hafa færst í aukana að ökumenn taki af stað á gulu blikkandi ljósi þó svo að fótgangendur séu enn á gangbraut. Umferðastofu hefur borist töluverður fjöldi kvartana vegna þessa og virðist vandamálið sérstaklega áberandi á Hringbraut við Þjóðminjasafnið og Háskóla Íslands.

Gangandi vegfarendur hafa forgang á gangbraut þegar gengið er á gulu blikkandi ljósi og bílaumferð má ekki fara af stað fyrr en tryggt er að þeir séu komnir yfir akbrautina. Jafnframt eiga ökumenn að stöðva fyrir gangandi við gangbrautir sem ekki eru ljósastýrðar. Einar Magnús Magnússon upplýsingafulltrúi Umferðarstofu segir að kvartanir hafi borist vegna þessa gegnum tíðina en að þeim hafi farið fjölgandi frá miðju síðasta ári.

Einar Magnús segir að líklega sé um að ræða athugunarleysi hjá ökumönnum. Umferðarstofa hefur bent ökumönnum á að virða rétt fótgangenda í umferðarfréttum en tilmælum hefur einnig verið beint til lögreglu að gera athugun á þessu.

Samkvæmt umferðarlögum er heimilt að sekta ökumann um 10 þúsund krónur fyrir að virða ekki gangbrautarrétt en auk þess fær hann 2 refsipunkta í ökuferilsskrá.