Lúterskir Hollendingar gefa Þjóðkirkjunni 5000 evrur

Lúterska kirkjan í Amsterdam hefur sent Þjóðkirkjunni 5000 evrur sem Hjálparstarf kirkjunnar mun sjá um að koma til fólks er þarf á aðstoð að halda hérlendis. Í tilkynningu frá kirkjunni tala forsvarsmenn gjafarinnar um þetta sem táknræna upphæð sem fylgi orðum þeirra um samstöðu með Þjóðkirkjunni og íslenskri þjóð í þeim efnahagsþrengingum sem hún glímir við.

Þá segir einnig í tilkynningu frá kirkjunni að þessi stuðningur lúterskra í Amsterdam við systurkirkju í Lúterska heimssambandinu er eitt af mörgum dæmum um stuðning og samstöðu sem lúterskar kirkjur hafa sýnt Þjóðkirkjunni eftir að efnahagsþrengingar hófust. Aðrar kirkjur hafa meðal annars stutt þátttöku kirkjunnar í erlendu samstarfi og Lúterska heimssambandið hefur boðið aðstoð við að skoða skuldir vegna Icesave í ljósi reynslu annarra landa af ólögmætri skuldsetningu.

Þá segir í tilkynningunni að slík samstaða sé mikilvæg í samfélagi kirknanna og víða sýnileg í sameiginlegu hjálparstarfi lúterskra kirkna, til dæmis núna á Haítí. Þá minnist Hollendingar með hlýhug stuðnings Íslendinga við Hollendinga árið 1953 þegar mikil flóð ollu því að nærri 2000 manns fórust. Við það tækifæri var gefið út sérstakt frímerki hér á landi til að styðja bágstadda í Hollandi.

Lúterski söfnuðurinn í Amsterdam hafði samband við Þjóðkirkjuna þegar fréttir bárust af Icesave-samkomulaginu og spurði um aðstæður og hver áhrif hrunsins væru fyrir íslenska þjóð. Miðlað var reynslu úr starfi kirkjunnar og þörf fólks fyrir að ræða um atvinnuleysi og erfiða skuldastöðu sína. Þá var einnig greint frá því að 300% aukning hefði orðið hefði orðið í innanlands aðstoð Hjálparstarfs kirkjunnar. Það er kærleiksþjónustudeild Lútersku kirkjunnar í Amsterdam sem sendir féð og hefur unnið að þessu í samvinnu við kærleiksþjónustusvið Biskupsstofu.

Lúterskir eru minnihlutahópur í Hollandi og telur alls um 25.000 manns. Lúterska kirkjan þar er hluti af stærri, sameinaðri kirkju, en heldur þó eigin söfnuðum.

Karl Sigurbjörnsson biskup Íslands og Jónas Þórisson framkvæmdastjóri Hjálparstarfs kirkjunnar, hafa sent þakkarbréf til kirkjunnar í Amsterdam og skýrt frá því á hvern hátt féð verði nýtt til að styðja fólk sem á í erfiðleikum eftir efnahagshrunið.

„Þessi höfðinglega gjöf er meira en táknræn og hún mun koma að góðum notum."

Upphæðin nemur tæpum 900 þúsund krónum.