Engin umsókn um sjö læknastöður

Enginn heimilislæknir sótti um sjö lausar stöður sem auglýstar voru nýverið. Um tuttugu læknar hafa flutt af landinu eftir efnahagshrunið, sýnir könnun Landlæknisembættisins.

Upp á síðkastið hefur umræða um skort á heimilislæknum verið nokkuð fyrirferðarmikil. Staðan víða úti á landi hefur verið erfið hvað þetta varðar um árabil en betur hefur gengið að manna þær stöður sem losnað hafa á höfuðborgarsvæðinu. Nú hefur orðið breyting þar á því að enginn sótti um sjö stöður heilsugæslulækna á höfuðborgarsvæðinu, eins og segir í Talnabrunni embættisins.

Nokkuð víða um land eru stöður á heilsugæslustöðvum mannaðar læknum sem eru menntaðir á öðrum sviðum en heimilislækningum. Þá hefur verið bent á að fram undan sé mikill skortur á heimilislæknum enda munu tugir heimilislækna hætta störfum á næstu tíu árum fyrir aldurs sakir.

Til þess að kanna mönnun lækna og hugsanlegar breytingar á stofnunum frá ársbyrjun 2009 aflaði Landlæknisembættið nýlega upplýsinga hjá framkvæmdastjórum lækninga á sjúkrahúsum, heilbrigðisstofnunum og heilsugæslustöðvum. Átján stofnanir af nítján svöruðu þessu bréfi embættisins en niðurstöður þessarar athugunar sýna að um 20 læknar hafa hætt störfum og flutt til útlanda frá ársbyrjun 2009.- shá