Hættir útgerð vegna veiðibanns ráðherra

„Þetta þýðir einfaldlega að mín heimamið eru horfin með öllu og við þurfum að hætta útgerð," segir Ómar V. Karlsson, útgerðarmaður á Hvammstanga, sem gerir út dragnótarbátinn Hörpu HU.

Jón Bjarnason sjávarútvegsráðherra hefur ákveðið að dragnótaveiðar innan tiltekinna svæða í sjö fjörðum skuli bannaðar. Verndarsjónarmið eru rök ráðherra. Bannið er hins vegar afar umdeilt, ekki síst fyrir þær sakir að Hafrannsóknastofnun komst að þeirri niðurstöðu að fátt benti til að veiðarnar væru skaðlegar umhverfinu.

Svæðalokunin er grundvölluð á stefnu ríkisstjórnarinnar um að takmarka veiðar afkastamikilla skipa á grunnslóð til að treysta veiðisvæði fyrir smærri báta með umhverfisvænni veiði.

Friðrik G. Halldórsson er talsmaður fyrir vistvænar strandveiðar í dragnót. „Sjávarútvegsráðherra er að ganga erinda smábátasjómanna og hlustar ekki á nein rök. Hann tínir til álit sjómanna og sveitarstjórna sem henta hans sjónarmiði og hefur allt annað að engu. Hann er að einkavinavæða aðgengið að miðunum, svo einfalt er það." Friðrik segir að dragnótasjómenn muni leita réttar síns. „Það getur ekki annað verið en að fólkið í landinu eigi sinn rétt þegar ráðherra misbeitir því valdi sem honum er trúað fyrir."

Friðrik segir að menn verði að gera sér grein fyrir því að það séu tíu bátar sem stunda dragnótaveiðar fyrir Norðurlandi og því sjái það allir að pláss sé fyrir alla til veiða.

Ómar segir að fjórir starfi við útgerð Hörpu HU sem hófst fyrir 26 árum og að henni komi þrjár fjölskyldur á Hvammstanga. Heildarafli útgerðarinnar á ári er um 300 tonn. „Við höfum alltaf reynt að gera sem mest úr því litla sem við höfum. Þannig höfum við getað verið hérna heima og haft örugga atvinnu," segir Ómar. „Það sem ég er svekktastur með er að ráðherra hafi ekki hlustað á rök heimamanna og tekið tillit til aðstæðna á hverjum stað."

Sveitarfélagið Húnaþing vestra ályktaði gegn veiðibanninu og var það mat sveitarstjórnar að engar efnislegar forsendur væru til þess að banna dragnótaveiðar í Húnaflóa og meta þurfi samfélagsleg áhrif veiðibannsins.

svavar@frettabladid.is