Guðbjartur: Margar ástæður fyrir töfum

Guðbjartur Hannesson félagsmálaráðherra segir margar ástæður fyrir því að stórframkvæmdir hafi tafist og ekki sé hægt að kenna ríkisstjórninni alfarið um tafirnar. Forseti Alþýðusambandsins segir ríkisstjórnina í gíslingu fámenns hóps sem komi í veg fyrir framkvæmdir.

Gylfi Arnbjörnsson forseti Alþýðusambandsins sagði í setningarræðu á aðalfundi ASÍ í gær að það væri áhyggjuefni að atvinnumálin hefðu verið tekin í gíslingu fámenns hóps innan ríkisstjórnarinnar og hún því í raun misst forræði í málinu. Guðbjartur Hannesson félagsmálaráðherra sem einnig ávarpaði aðalfundinn segir þetta mikla einföldun.

Til að mynda hafi skort fé til fjárfestinga. Tekist hafi verið á um veggjöld vegna vegaframkvæmda og Landsvirkjun hafi ekki fengið lán vegna Búðarhálsvirkjunar. Ríkisstjórnin kunni að hafa lofað of miklu í stöðugleikasáttmálanum en unnið sé að því að koma málum áfram.