Flugsveitin þarf sjálf að borga fyrir dvölina

Áætlað er að gjaldeyristekjur Íslendinga vegna loftrýmisgæslu bandarísku flugsveitarinnar hérlendis, nú í september, nemi milli tvö og þrjú hundruð milljónum króna.

Tíu F-15 orustuþotur bandaríska flughersins komu til Keflavíkurflugvallar í gær en þær verða hér á landi til 24. september. Þegar fyrst var samið um loftrýmisgæsluna var miðað við að íslensk stjórnvöld tæku á sig drjúgan kostnað við veru erlendu sveitanna hérlendis.

Þeir samningar voru hins vegar endurskoðaðir eftir efnahagshrunið og nú borgar íslenska ríkið ekki nema tíu til fimmtán milljónir króna í hvert sinn sem NATO-sveit kemur hingað til að passa loftrýmið. Annan kostnað þarf viðkomandi her að borga sjálfur og hann er ekki svo lítill.

Bandaríkjaher þarf þannig að kaupa eldsneyti á þoturnar, greiða afgreiðslugjöld á Keflavíkurflugvelli, hann þarf að kaupa öryggisgæslu, leigja sér bílaleigubíla og það þarf að kaupa mat fyrir allan mannskapinn, 175 hermenn, fjórar máltíðir á dag fyrir hvern einasta þeirra.

Hjá Varnarmálastofnun áætla menn að útgjöld af þessu tagi nemi milli tvö og þrjúhundruð milljónum króna meðan á dvölinni stendur. Þá eru ótaldir þeir fjármunir sem hermennirnir eyða sjálfir í eigin frítíma þegar þeir fara út á lífið og skoða sig um.