Skólapiltar gera grín á ÍNN

Gamanþátturinn 12:00, sem upphaflega var á vegum nemendafélags Verslunarskólans, hefur vakið nokkra athygli og í kjölfar vinsældanna var þátturinn seldur til sjónvarpsstöðvarinnar ÍNN en undir nýju heiti.

Níu ungir strákar standa á bak við þættina en þeir eru allir nemendur í Verslunarskólanum og byrjuðu fyrst með þáttinn í fyrra, þá á vegum nemendafélagsins.

„Við fengum að halda áfram með þáttinn þetta skólaárið og það hefur bara gengið vonum framar og nú þetta. Þetta er mikið áhugamál og við höfum oft talað um hvað það væri gaman að geta haldið þessu áfram eftir útskrift þannig að þetta er draumur að rætast,“ segir Ásgeir Orri Ásgeirsson, einn níumenninganna.

Gengið var frá samningum við ÍNN fyrir um hálfum mánuði og verður fyrsti þáttur hins nýja Grínlands frumsýndur í kvöld.

„Við höfum ekki fengið mikinn tíma til að undirbúa okkur, en ÍNN keypti alla gömlu þættina líka og við munum nota þá í bland við nýtt efni. Við miðum við að vera með marga sketsa og eitt frumsamið tónlistaratriði í hverjum þætti.“

Að sögn Ásgeirs Orra sækja piltarnir innblástur víðs vegar að en oftast taka þeir fyrir efni sem þeim þykir sjálfum fyndið.

Í þáttum 12:00 skipa tónlistaratriðin veigamikinn sess og segir Ásgeir Orri það tilviljun að þeir skuli allir geta sungið.

„Við erum allir miklir söngfuglar og það er um að gera að nýta hæfileikana. Ég og tveir vinir mínir höfum verið að semja mikið saman og meðal annars samið lög fyrir hljómsveitina Nylon.“ Fyrsti þáttur Grínlands verður frumsýndur í kvöld klukkan 21.30 og verða þeir sýndir vikulega næstu þrjá mánuðina. sara@frettabladid.is