Ekki hefur náðst samkomulag um þinglok

Enn hefur ekki náðst samkomulag milli stjórnar og stjórnarandstöðu um þinglok, en samkvæmt heimildum fréttastofu funduðu formenn flokkanna stíft um þau í gær. Helstu ágreiningsmálin sem enn á eftir að finna farveg eru varnarmálalögin, vatnalögin og lög um innstæðutryggingar. Þá mun vera þverpólitískur vilji til að taka á skuldavanda heimilanna áður en þingi er slitið. Viðmælendur fréttastofu útiloka ekki að þinglok dragist, en þau voru upphaflega áætluð á þriðjudag. Það mun þó skýrast í byrjun vikunnar.

Þingfundi lauk í gær með síðari umræðu um samgönguáætlun til ársins 2012. Ein lög voru afgreidd frá þinginu í gær, en það voru hertar reglur um fjármálafyrirtæki sem setja fyrirtækjunum þrengri skorður í starfsemi sinni en áður. Þá bar einnig hátt sú samstaða sem ríkti í þinginu um breytingar á frumvarpi um stjórnlagaþing.

Þingið lauk einnig fyrstu umræðu um iðnaðarmálagjald, og gengur frumvarp þar að lútandi nú til iðnaðarmálanefndar og annarar umræðu. Umræðum og atkvæðagreiðslum um fjölmörg mál var frestað áður en þau voru til lykta leidd, en þingið fundar næst á hádegi á morgun. Samkvæmt dagskrá þingsins fara eldhúsdagsumræður fram annað kvöld klukkan 9.