Ástkonur Tigers geta ekki hætt

Þótt Tiger Woods ætli að keppa á Masters-mótinu í apríl þá heldur farsinn í kringum einkalíf hans áfram. Nú hefur klámmyndaleikkonan Joslyn James opnað heila heimasíðu sem er tileinkuð einkar klámfengnum sms-skilaboðum til hennar á þeim tíma sem þau eiga að hafa verið að hittast. Þótt Tiger og Elin séu nú að vinna í sínu hjónabandi þá virðast hjákonurnar njóta sviðsljóssins sem þetta kynlífshneyksli hefur alið af sér.

Jafn borgaralegt blað og Fréttablaðið er getur ekki haft allt eftir sem Tiger á að hafa skrifað ástkonu sinni. Breska blaðið The Sun birtir brot úr smáskilaboðunum og þar kemur fram að Tiger virðist hafa haft gaman af fremur ruddalegum og ofbeldisfullum kynlífsathöfnum sem fólust meðal annars í hártogunum, rassskellingum og annars konar barsmíðum. Joslyn var meðal þeirra fyrstu sem stigu fram og greindu frá ástarsambandi sínu við Tiger. Hún hefur haldið því fram að Tiger hafi í tvígang gert sig ólétta; hún hafi hins vegar misst fyrra fóstrið og farið í fóstureyðingu í seinna skiptið.