Meirihluti frambjóðenda á móti flugvellinum

Meirihluti frambjóðenda í forvali Vinstri grænna fyrir borgarstjórnarkosningarnar í vor, sem á annað borð svöruðu fyrirspurn fréttastofunnar, vill að flugvallarstarfsemi verði lögð af í Vatnsmýrinni.

Fréttastofan sendi nítján frambjóðendum í forvali Vinstri grænna sem fer fram á morgun vegna borgarstjórnarkosninganna í vor, eftirfarandi fyrirspurn:

Hvaða stefnu vilt þú að borgarstjórn Reykjavíkur hafi í málefnum Reykjavíkurflugvallar?

A) Að flugvöllurinn fari úr Vatnsmýri.

B) Að flugvöllurinn verði í Vatnsmýri

Tíu af nítján frambóðendum svöruðu fréttastofunni, en þrír þeirra, Birna Magnúsdóttir, Elín Sigurðardóttir og Þorleifur Gunnlaugsson treystu sér ekki til að svara spurningunni án ítarlegs rökstuðnings og níu aðrir svöruðu fyrirspurninni yfirhöfuð ekki.

Fimm af þeim sjö sem tóku afstöðu til spurningarinnar vilja að flugvöllurinn fari úr Vatnsmýrinni, það eru þau Davíð Stefánsson, Einar Gunnarsson, Ingimar Oddsson, Sóley Tómasdóttir og Þór Steinarsson.

Kristján Hreinsson var sá eini sem vill afdráttarlaust að flugvöllurinn verði áfram í Vatnsmýrinni og Hermann Valsson segir að flugvöllurinn verði þar áfram á meðan ekki finnist hagkvæmari staður fyrir hann.

Fréttastofn hefur að undanförnu birt svör frambjóðenda Sjálfstæðisflokks og Samfylkingar við sömu spurningu og í þeirra hópi reyndist yfirgnæfandi meirihluti frambjóðenda hlyntur því að flugvöllurinn fari úr Vatnsmýrinni.