Örfá kúabú með lífræna vottun

Fjögur kúabú hér á landi eru með lífræna vottun. Til að fá slíka vottun þarf að uppfylla mun strangari skilyrði um aðbúnað dýra en almennar reglur segja til um. Þannig er kúm á búum með lífræna vottun hleypt út eins oft og veður leyfir, árið um kring. Einnig er gert ráð fyrir að þegar kýrnari eru inni þá geti þær hreyft sig meira en gengur og gerist á kúabúum.

Þrjú af fjórum lífrænt vottuðum kúabúum selja mjólk og mjólkurvörur til neytenda undir merkinu Biobú. Þau þrjú bú sem sjá Biobú fyrir lífrænni mjólk eru Búland í Landeyjum, Finnastaðir í Eyjafirði og Neðri Háls í Kjós en það voru ábúendur á Neðra Hálsi sem stofnuðu Biobú árið 2002.

Fjórða búið er Skaftholt í Gnúpverjahreppi sem selur ekki vörur á markað.

Á Neðra Hálsi eru kýrnar bundnar á básum en þær eru settar út minnst vikulega yfir vetrartímann, yfirleitt tvisvar til þrisvar í viku, og eru þær hafðar úti á beit yfir sumarið. Kýrnar eru síðan teknar inn til mjalta bæði kvölds og morgna.

Kristján Oddsson, bóndi á Neðra Hálsi og annar stofnenda Biobús, segir hlutfall lífrænt vottaðra búa hér á landi vera mjög lágt miðað við í nágrannalöndum okkar en heildarfjöldi kúabúa hér er um sex hundruð. Ástæðuna telur hann helst vera þá að fólk telji almennt að staðan á hefðbundnum búum sé góð og lífræna vottunin því óþarfi. Stór hluti neytenda hér á landi virðist einnig lítt meðvitaður um hvað felst því þegar vara er lífrænt vottuð.

Kúnum á Neðra Hálsi er aldrei gefið korn eða kjarnfóður heldur aðeins gras og hey. Við heyframleiðsluna er síðan aðeins notaður lífrænn áburður. Dýrunum eru heldur ekki gefin lyf nema í neyðartilvikum en þörf á lyfjum virðist fara minnkandi þegar um lífræna ræktun er að ræða.

Auk Biobús fær Mjólkursamsalan mjólk frá Neðra Hálsi og selur undir heitinu „lífræn drykkjarmjólk."