Hanna Birna hafnar ásökunum um töffaragang

Borgarstjóri Reykjavíkur segist efast um að geta átt samvinnu við Sjálfstæðisflokkinn og sakar hann um töffaragang. Oddviti Sjálfstæðisflokksins segir engan töffaragang í flokknum, og menn megi ekki taka ágreiningi persónulega.

Jón Gnarr, borgarstjóri Reykjavíkur, heldur úti dagbók á Fésbókinni þar sem hann deilir hugleiðingum um dagleg störf sín með borgarbúum og öðrum, en alls fylgjast á 16 þúsund manns með skrifum hans.

Í gær skrifaði borgarstjórinn að honum þætti hann naive, hann réði ekki við þetta og næði ekki að vinna fallega. Hann efaðist um að geta átt samvinnu við Sjálfstæðisflokkinn, hann sýndi auðmýkt en fengi lítið á móti nema töffaragang, hroka eða fálæti. Hann spyr hvort hann eigi að hætta að brosa, eða reyna áfram að vingast við fólk sem ekki ber virðingu fyrir honum og því sem hann og aðrir eru að reyna að gera í borginni.

Alls höfðu rúmlega 240 manns sent Jóni skilaboð vegna ummælanna í morgun. Nokkrir til að senda honum pillu, en fleiri þó til að hvetja borgarstjórann til að brosa áfram.

Full persónuleg umræða

Hanna Birna Kristjánsdóttir, oddviti Sjálfstæðisflokksins í Reykjavík, segir engan töffaragang eða hroka í flokknum og borgarfulltrúar hans beri virðingu fyrir öllum kjörnum fulltrúum. Hins vegar séu flokkarnir ólíkir og þeir verði að geta rætt ágreiningsmál og gæta þess að taka þeim ekki persónulega.

„Mér finnst þessi umræða nú full persónuleg. Það er okkar hlutverk í stjórnmálum að skiptast á skoðunum og tryggja að við séum að standa vörð um hag borgarbúa. Það gerum við með því að ræða málin og þó það kom upp ólíkar skoðanir í þeim efnum þá held ég að menn verði að gæta þess að taka þeim ekki of persónulega," segir Hanna Birna.

„Það er hins vegar ekkert launungarmál að við sjálfstæðismenn höfum að undanförnu gagnrýnt núverandi meirihluta Besta flokksins og Samfylkingarinnar fyrir að nýta sumarið illa til að finna leiðir til hagræðingar í borgarkerfinu. Við höfum alfarið hafnað leið skatta- og gjaldskrárhækkana eins og virðist því miður stefna í. Það má vel vera að borgarstjóri upplifi þessa hörðu afstöðu okkar sem einhverskonar töffaragang eins og hann orðar það, en það er það auðvitað ekki."

„Vinnum saman"

Sjálfstæðisflokkurinn fór inn í síðustu kosningabaráttu með ný vinnubrögð og einkunnarorðin „vinnum saman" að leiðarljósi. Hanna segir ekkert hafa breyst í þeim efnum.

„Við höfum unnið með meirihlutanum eins og við höfum getað, og við höfum gert það af mikilli einlægni og heiðarleika eins og borgarstjóri sagði sjálfur í síðustu viku, svo skoðanirnar breytast nú ört. Það hefur dálítið skort á það af hálfu meirihlutans að vera í því samstarfi. Það hefur ekki mikið gerst á vettvangi borgarstjórnar þetta sumarið og við höfum kvartað undan því, en það er gott ef menn vilja spýta í lófana hvað það varðar," segir Hanna Birna.