Stoltur af íslensku sveitinni

Íslenska rústabjörgunarsveitin sem leitaði rústum húsa sem hrundu í jarðskjálftanum á Haítí í síðustu viku komu til landsins um tvöleytið í nótt.

Björgunarsveitarmennirnir voru með þeim fyrstu á staðinn eftir skjálftann og voru á vettvangi í um viku. Þeir voru að vonum þreyttir við komuna á Keflavíkurflugvöll þar sem aðstandendur þeirra tóku á móti þeim. Össur Skarphéðinsson utanríkisráðherra mætti einnig til að taka á móti hópnum.

„Ég þakkaði þeim fyrir af einlægu hjarta og næstum því með tár í augunum því ég er svo stoltur af þeim," segir Össur. Fórnfýsi sveitarinnar og sú staðreynd að hún hafi verið fyrst á vettvang hafi vakið athygli. „Ég hef hugsað mikið til þeirra og verið hrærður yfir því yfir hvað sveitin hefur verið öflug. Þetta er ekki silfurlið heldur gulllið."