Milljónatjón hjá Skinnfiski

Mikið tjón varð hjá Skinnfiski í Sandgerði í nótt þegar mikill eldur kom upp í fiskikörum sem stóðu upp við hús fyrirtækisins. Grunur leikur á að kveikt hafi verið í en framkvæmdastjóri Skinnfisks segir tjónið hlaupa á milljónum.

Skömmu fyrir klukkan tvö í nótt var tilkynnt um mikinn reyk við fyrirtækið og fóru lögregla og slökkvilið á vettvang. Þrjú önnur fyrirtæki eru í húsinu en slökkvilið náði fljótt tökum á ástandinu.

Ari Leifsson, framkvæmdastjóri Skinnfisks var á vettvangi í nótt og vill hann þakka lögreglu og slökkviliði fyrir snarræði sitt enda hafi tekist að koma í veg fyrir mun meira tjón.

Töluverðar skemmdir eru þó á húsinu en heildarmat á tjóninu fer fram í dag. Greinilegt er að mikill hiti hafi skapas á morgun stöðum í húsinu, rúður eru brotnar og rafmagnið illa farið.

Að sögn Ara er óvíst hvort hægt verði að hefja starfsemi hjá fyrirtækinu á morgun en vonandi dregst það ekki lengur en fram á þriðjudag.