Fyrstu loforð nýrrar borgarstjórnar efnd

Ókeypis verður í sund fyrir börn í Reykjavík frá næsta laugardegi og út sumarið. Þetta var ein af tíu tillögum sem nýi borgarstjórinn lagði fyrir borgarráð í dag. Áætlaður kostnaður er 12-14 milljónir króna.

Nýr meirihluti Besta flokksins og Samfylkingar gekk til sinna fyrstu verka í dag. Á borgarráðsfundi í morgun lagði Jón Gnarr borgarstjóri fram tíu tillögur. Af þeim var meðal annars samþykkt að láta útfæra tillögu að opnun heimilis fyrir útigangskonur, fela leikskólasviði að endurskoða reglur um systkinaforgang - í því skyni að taka hann upp að nýju.

Tillögu Jóns um undirbúa leiksvæði fyrir börn í Perlunni var frestað - og sömuleiðis tillögu hans um kvennakvöld í Reykjavík.

Borgarráð samþykkti líka að setja upp vefinn Betri Reykjavík á heimasíðu Reykjavíkurborgar og að hefja fegrun og endurbætur á eldri hverfum borgarinnar - í Breiðholtinu. Sömuleiðis var samþykkt að útfæra leiðir til að hvetja til menningarstarfsemi í skólum - og veita menningarfána þeim skólum sem skara fram úr á því sviði.

Og síðast en ekki síst samþykkti borgarráð að frá og með næsta laugardegi og til 31. ágúst verði ókeypis í sund í Reykjavík fyrir öll börn og ungmenni undir 18 ára aldri. Samkvæmt upplýsingum frá aðstoðarmanni borgarstjóra er áætlaður kostnaður 12-14 milljónir króna en gert er ráð fyrir að borgandi foreldrar standi undir þeim kostnaði.