Bankastjórar vaktir af Nýju Íslandi

Samtökin Nýtt Ísland munu vekja upp bankastjóra og forstjóra fjármálafyrirtækja á laugardagsmorgun til að minna á kröfur fólksins í landinu. Kröfurnar verða bornar fram á tíunda kröfu- og mótmæla fundi vetrarins á Austurvelli á laugardaginn kl 15:00.

Hátalarakerfi verður stillt upp við heimili bankastjóra og forstjóra lánastofnana. Bankastjórarnir sem um ræðir eru Birna Einarsdóttir, Íslandsbanka, Ásmundur Stefánsson, Landsbanki Íslands, þar sem fyrstu mótmælin verða og svo Finnur Sveinbjörnsson, Arion Banki.

Einnig munu forstjórar bílalánafyrirtækja fá vakningu samkvæmt tilkynningu.

Það eru forstjórar SP Fjármögnunar, Lýsingar, Avant, TM og Frjálsa Fjárfestingabankans.

Í tilkynningu frá Nýju Íslandi segir að Birna Einarsdóttir, bankastjóri Íslandsbanka, er að íhuga gagntilboð um úrbætur/leiðréttingar sem samtökin afhentu Íslandsbanka síðastliðinn þriðjudag.

Fyrirhugað er að hittast á þriðjudaginn kemur kl 12:15 við höfuðstöðvar Íslandsbanka Kirkjusandi en þar mun Birna væntanlega svara gagntilboði samtakanna NÍ.