Prófkjör og Forvöl víða um land

Prófkjör og forvöl fóru fram víða í dag fyrir komandi sveitastjórnarkosningar. Þátttakan hefur verið góð en mesta spennan er í Reykjavík þar sem tveir borgarfulltrúar takast á um efsta sætið á lista Vinstri-grænna.

Þorleifur Gunnlaugsson borgarfulltrúi er oddviti VG í Reykjavík. Hann sækist eftir fyrsta sætinu en að honum sækir Sóley Tómasdóttir. Baráttan þeirra á milli hefur að mestu farið fram á bak við tjöldin.

En það vekur athygli að 300 nýskráningar voru í flokkinn dagana fyrir forvalið. Fyrstu tölur verða birtar um klukkan sjö. VG er líka með forval á Akureyri þar sem Andrea Hjálmsdóttir og Baldvin H. Sigurðsson takast á um fyrsta sætið.

Hjá Sjálfstæðismönnum var kosið í Mosfellsbæ, Álftanesi, Garðabæ og Grindavík í dag.

Í Garðabæ eru tæplega 3000 á kjörskrá en í Mosfellsbæ tæplega 1500.

Upplýsingar um úrslit í prófkjörum dagsins fara inn á vísir.is um leið og þær berast.