Makríll reyndist tollfrjáls - villa í tollakerfinu

Við yfirferð á markaðsaðgangi fyrir makríl til Evrópusambandsins (ESB) uppgötvaðist villa í tollakerfi ESB varðandi frosin makrílflök samkvæmt tilkynningu frá sjávarútvegsráðuneytinu.

Samkvæmt EES-samningnum og fríverslunarsamningi Íslands og ESB frá árinu 1972 skal útflutningur á frosnum fiskflökum, af öðrum tegundum en ferskvatnsfiskum vera tollfrjáls.

Fulltrúar íslenskra stjórnvalda hafa tekið málið upp við framkvæmdastjórn ESB sem hefur leiðrétt villuna afturvirkt frá 1. janúar 2010. Útflutningur á frystum makrílflökum frá Íslandi til ESB er því tollfrjáls.

Ef fyrirtæki hafa flutt fryst makrílflök með tolli til ESB fyrir 1. janúar 2010 er viðkomandi aðilum bent á að hafa samband við utanríkisráðuneytið.