Tilkynnt um nýjan framkvæmdastjóra í næstu viku

Stjórn Íbúðalánasjóðs hefur ekki gengið frá ráðningu nýs framkvæmdastjóra sjóðsins. Gunnar S. Björnsson, varaformaður stjórnar, segir að ákvörðun um nýjan framkvæmdastjóra verði að öllum líkindum tekin á stjórnarfundi í næstu viku. Í framhaldinu verði tilkynnt um eftirmann Guðmundar Bjarnasonar sem lét af störfum sem framkvæmdastjóri á fimmtudaginn. Guðmundur hefur stýrt sjóðnum allt frá því að hann hætti í stjórnumálum fyrir rúmum áratug.

Gunnar vildi ekki gefa upp hvort ágreiningur væri innan stjórnarinnar um hvern ætti að ráða sem framkvæmdastjóra. 27 sóttu um stöðuna og voru fjórir umsækjendur boðaðir í viðtöl og því stendur valið á milli þeirra, að sögn Gunnars.