Rúm 70 prósent vilja ný framboð til Alþingis

Rúmlega 70 prósent þjóðarinnar telur frekar mikla eða mjög mikla þörf fyrir ný framboð til Alþingis. Þetta kemur fram í niðurstöðum nýrrar könnunar MMR.

Tæplega 18 prósent svaraenda sögðu litla þörf fyrir ný framboð og tæp 12 prósent voru á báðum áttum.

Þegar spurt var um ný framboð var átt við framboð sem kæmu þá til viðbótar eða í staðinn fyrir þá flokka sem nú eiga fulltrúa á Alþingi.

Séu svör skoðuð eftir lýðfræði svarenda má sjá nokkuð jöfn viðhorf til málefnisins milli hópa. Þó með þeim undantekningum að 60,7% svarenda yfir fimmtugu, 63,7% þeirra sem búa utan höfuðborgarsvæðisins og 64,4% þeirra sem búa við heimilistekjur á bilinu 400-599 þúsund krónur töldu mikla þörf fyrir ný framboð.

Í öllum öðrum hópum sem skoðaðir voru reyndist fjöldi þeirra sem töldu mikla þörf fyrir ný framboð vera um og yfir 70%.

Könnunin var framkvæmd dagana 5.-8. október. Í úrtaki voru einstaklingar á aldrinum 18 til 67 ára valdir handahófskennt úr hópi álitsgjafa MMR. Þátttakendur svöruðu spurningum á netinu og alls tóku 830 þátt.