Byssum stolið og hleypt af skotum á Akureyri

Leit lögreglunnar á Akureyri að byssu- og skotfæraþjófum, sem skutu að minnsta kosti þremur skotum í íbúðarhverfi í bænum í fyrrinótt, hefur ekki enn borið árangur.

Lögreglan hafði tal af fjölda manns í gær við rannsókn málsins, en án árangurs. Í gærmorgun kom í ljós að brotist hafði verið inn í íbúðarhús sunnan við Glerá, og þaðan stolið fartölvu, myndavél og lyklum að byssuskáp, sem er í bílskúrnum.

Þaðan stal þjófurinn, eða þjófarnir, tveimur haglabyssum og talsverðu af skotfærum og er þar að öllum líkindum komin skýringin á skothvellunum.