Jón Gnarr tjáir sig um stóra skíðamálið

Jón Gnarr borgarstjóri segir harkaleg viðbrögð við þeim hugmyndum hans að loka skíðsvæðinu í tvö ár hafa verið fyrirsjáanleg. „Viðbrögðin komu mér ekki á óvart. Mér fannst þau ekkert sérstaklega harkaleg. Ég held að flestir geri sér grein fyrir þeirri erfiðu stöðu sem við erum í og þetta vekur menn kannski til umhugsunar um að leita betri lausna varðandi rekstur í Bláfjöllum, sem og annarsstaðar," segir Jón.

Spurður hvort hugmyndin um lokun Bláfjalla hafi verið sett fram í hálfkæringi eða fúlustu alvöru, svarar hann: „Hvorugt. Þetta var sett fram sem dæmi um það sem við höfum verið að velta fyrir okkur. Þetta var gert til þess að gefa fólki smjörþefinn af því sem við erum að fást við. Það er velt við hverjum steini og í ljósi þess að opnun í Bláfjöllum var sáralítil síðasta vetur vildum við skoða þessa hugmynd."

Sjálfur segist Jón ekki vera skíðagarpur. „Nei, ég er ekki skíðamaður, en börnin mín hafa verið það í gegn um tíðina."

Í Kastljósi í fyrrakvöld ræddi borgarstjóri niðurskurðartillögur og sagði meðal annars: „Við erum með fullbúið skíðasvæði í Bláfjöllum. Það eina sem vantar upp á þar er snjór. Hvernig væri að loka Bláfjöllum í tvö ár til dæmis? Það myndu sparast 87 milljónir þar."

Í framhaldinu hafa fjölmargir fordæmt þessar hugmyndir, nú síðast stjórn Skíðaráðs Reykjavíkur.