Össur segir uppsögn Þórhalls vera siðlausa

Össur Skarphéðinsson segir að sér finnist það forkastanlegt að fréttamanni Ríkisútvarpsins sé sagt upp störfu vegna þess að hann skrifaði samtalsbók við fyrrverandi stjórnmálamann. Þetta sagði Össur á þingfundi í dag.

Það var Guðlaugur Þór Þórðarson, þingmaður Sjálfstæðisflokksins, sem vakti athygli á málinu og sagði að fréttamaðurinn hefði ekki fengið neitt tækifæri til málsvarna. Guðlaugur sagði að fréttamaðurinn, sem er Þórhallur Jósepsson, hafi ekkert fjallað um rannsóknarskýrslu Alþingis, Landsdóm eða Árna Mathiesen. Bókin er samtalsbók við Árna eins og fram hefur komið.

„Starfsmenn ríkisins hljóta, rétt eins og allir aðrir, að hafa rétt til þess að tjá skoðanir sínar eigin skoðanir í gegnum bók með þessum hætti," sagði Össur. „Ég tel að þetta hljóti að vera handan við það sem rétt er og siðlegt, án þess að ég þori að fullyrða að það sé löglaust. En mér finnst ekki að opinber stofnun eigi að haga sér með þessum hætti," segir Össur.

Össur sagðist telja að bók Árna hljóti að varpa fróðlegu sjónarhorni á mjög þungvæga atburðarrás í sögu þjóðarinnar. „Mér finnst það sjálfsagt að fyrrverandi stjórnmálamaður sem var þátttakandi i þessari atburðarrás skrifi bók um það, leggi hana fyrir þjóðina til að skýra þetta mál og fráleitt að meina fréttamanni að taka þátt í því," sagði Össur.