Sjálfstæðisflokkurinn ætlar að birta allt

Á næstu vikum ætlar Sjálfstæðisflokkurinn að birta upplýsingar um heildarframlög til flokksins allt aftur til ársins 2002.

Nöfn þeirra sem styrkt hafa flokkinn verða einnig birt, að því gefnu að þeir samþykki að verða nafngreindir. Svo segir Jónmundur Guðmarsson, framkvæmdastjóri flokksins.

Rétt fyrir áramót birti Ríkis­endur­skoðun upplýsingar frá stjórnmálaflokkunum um framlög og fjárhag þeirra allt aftur til 2002. Sjálfstæðisflokkurinn skar sig úr þar, því upplýsingar frá honum takmörkuðust við flokksskrifstofuna eina og enginn styrkveitandi var nafngreindur.

„Ástæðan fyrir því að við gáfum ekki upp þessi nöfn var sú að þau eru mörg og við vorum, og erum enn, að leita samþykkis frá þeim sem veittu styrkina,“ segir Jónmundur og bendir á að flokkurinn starfi í 140 einingum um allt land. „Við erum að hringja í þá, en þetta eru ansi mörg símtöl,“ segir hann.

Að þessu loknu, vonandi á næstu vikum, verði Ríkisendurskoðun svo sendar nýjar og ítarlegri upplýsingar.

„Það stóð aldrei annað til, en tíminn var naumur þarna fyrir áramót og verkið mikið,“ segir hann.

Spurður hvort einhvers konar átak verði gert í sambandi við komandi sveitarstjórnarkosningar, um að gamlir frambjóðendur skili inn upplýsingum aftur í tímann, segir Jónmundur að allir frambjóðendur hafi verið hvattir til að fara að tilmælum Ríkisendurskoðunar. „Síðan er það í höndum hvers og eins að sinna því verki,“ segir hann.

Nokkur þeirra sem stefna á efstu sætin í höfuðborginni skiluðu Ríkisendur­skoðun ekki upplýsingum um styrki fyrir síðustu kosningar, svo sem þau Júlíus Vífill Ingvarsson, Þorbjörg Helga Vigfúsdóttir og Kjartan Magnússon. - kóþ