Laun lækna lækkuð

Laun lækna hafa lækkað minna frá bankahruni en laun hjúkrunarfræðinga, ljósmæðra og sjúkraliða, þvert á markmið um kjarajöfnun í niðurskurðinum. Heilbrigðisráðherra hyggst beita sér fyrir því að laun lækna skerðist meira en laun annarra hópa í stéttinni.

Samkvæmt nýjum tölum hafa meðallaun lækna lækkað um 6,9% frá fjórða ársfjórðungi 2008 til fyrsta ársfjórðungs 2010. Á sama tímabili hafa meðallaun hjúkrunarfræðinga lækkað um 9,7% og ljósmæðra um 8,4%. Meðallaun sjúkraliða hafa lækkað mest eða um 10,3%.

Álfheiður Ingadóttir, heilbrigðisráðherra, segir að tölurnar sýni að markmið um kjarajöfnun í stéttinni hafi ekki náðst.

Það er ljóst að það hefur ekki náðst sá árangur í kjarajöfnun sem að var stefnt í þessum niðurskurði, þannig að greinilega hefur orðið langmest launalækkun hjá þeim sem hafa lægstu launin," segir hún.

Álfheiður segir að lækkunin á launum lækna sé mest á sjúkrahúsunum, minni í heilsugæslu en langminnst á heilbrigðisstofnunum um landið. Meðallaun lækna þar nema nú 1,4 milljónum króna.

„En það er auðvitað ljóst að það eru allmargir sem eru yfir þeim meðallaunum líka, þetta er til skoðunar og til þess að verja störfin í landinu þurfum við að lækka hæstu laun," segir Álfheiður.

Aðspurð hvernig hún ætli að ná því fram svarar Álfheiður: „Það er verið að gera það með eftirfylgni - það er búið að gera öllum grein fyrir þessari stefnu og leiðarljósum."