Reykjavíkurborg þarf að binda 12 milljarða

Reykjavíkurborg þarf að leggja 10 til 12 milljarða króna til hliðar til að sýna fram á fjárhagslegan styrk sinn sem bakhjarl Orkuveitu Reykjavíkur (OR).

Borgin hefur sett á laggir áhættustýringarhóp og ákveðið að vinna markvisst að því að auka trúverðugleika borgarinnar sem ábyrgðaraðila á lánamörkuðum.

„Í stuttu máli er Reykjavíkurborg komin af afneitunarstiginu," segir Dagur B. Eggertsson, formaður borgarráðs. „Menn hafa verið að ýta á undan sér býsna miklum skafli í málefnum Orkuveitunnar. Við teljum ástæðu til að taka þessi mál föstum tökum," „Áhætta A-hluta borgarsjóðs vegna Orkuveitu Reykjavíkur felst einkum í mögulegri lausafjáráhættu sem gæti birst í því að lánveitandi OR krefur A-hluta borgarsjóðs um að efna greiðsluskuldbindingu sem OR getur ekki efnt," segir í greinargerð fjármálastjóra borgarinnar með þeim tillögum sem samþykktar voru á borgarráðsfundi í gær.

„Forsendur þess að unnt verði að ná árangursríkri endur-fjármögnun OR og fjármögnun nýframkvæmda eru annars vegar að lánamarkaður hafi trú á greiðsluhæfi og áætlunum Orkuveitu Reykjavíkur og hins vegar að lánamarkaður hafi trú á bakábyrgðaraðila OR, A-hluta borgar-sjóðs."

Sú aðgerð að halda sterkri lausafjárstöðu með því að tíu til tólf milljarðar króna verði lagðir til hliðar muni hafa áhrif á aðgengi og lánskjör við samningsgerð um endurfjármögnun skulda Orkuveitu Reykjavíkur.

OR mun þurfa að endurfjármagna að minnsta kosti 33 milljarða króna skuldir í ár og næstu þrjú ár og er þá ekkert litið til lántöku vegna nýrra fjárfestinga.

Í minnisblaði fjármálastjóra kemur einnig fram að hagræðing í rekstri Orkuveitunnar muni litlum árangri skila til þess að auka möguleika fyrirtækisins á að greiða af skuldum sínum þar sem breytilegur rekstrarkostnaður er tiltölulega lítill. Hækkun gjaldskráa sé skilvirkasta leiðin til þess að tryggja að fyrirtækið geti greitt af skuldum sínum.

Fjármálastjóri borgarinnar hefur lagt til að áætlun um þróun gjaldskráa næstu ára verði hraðað. Um 20 prósenta hækkun gjaldskrár mundi þó aðeins duga til þess að standa undir afborgunum og vaxtagreiðslum þetta ár og frekari hækkanir yrðu þá nauðsynlegar vegna skulda næsta árs. peturg@frettabladid.is