Efaðist aldrei um orð svikahrappsins

Þriggja daga réttarhöldum yfir Michael Craig Sundet, 29 ára Norðmanni, lauk á föstudag. Sundet var handsamaður eftir að íslensk kona kærði hann í vor fyrir að hafa svikið út úr sér fé. Eftir handtökuna kom í ljós að að svik hans voru umfangsmeiri en í fyrstu var talið.

Samkvæmt ákæru hafði Sundet svikið út úr þrjátíu einstaklingum og fyrirtækjum 700 þúsund norskar krónur, eða sem samsvarar tæpum fjórtán milljónum íslenskra króna. Sundet játaði sök í 27 af 42 ákæruliðum.

Konan, sem ekki vill láta nafns síns getið, kynntist Sundet í Noregi þar sem hún var í fimm daga heimsókn. Þau náðu vel saman og ákvað hann að heimsækja hana til Íslands í kjölfarið þar sem hann dvaldi í tæpar þrjár vikur.

„Hann sagði að fjölskylda hans væri vel stæð og mamma sín hefði unnið í lottói í Noregi. Þegar mig fór að gruna að ekki væri allt með feldu prófaði ég að senda mömmu hans póst, vegna þess að plönin voru þau að ég ætlaði að flytja út. Hún svaraði um hæl og sagðist hlakka til að hitta mig. Ég átta mig núna á því að hún var með honum í þessu öllu saman," segir konan. „Hann kom rosalega vel fyrir. Var sjarmerandi og sannfærandi. Ég efaðist aldrei um neitt sem hann sagði mér."

Konan bar vitni fyrir réttinum í Noregi símleiðis á fimmtudag. Sundet er ekki búinn að játa á sig brotin gegn henni, né tveimur norskum konum sem hafa svipaða sögu að segja. Norskir fjölmiðlar kalla Sundet Kvennasvindlarann.

„Þeir sögðu mér að þegar hann var spurður af lögreglunni af hverju hann geri þetta alltaf aftur og aftur, þá hafi hann svarað að það væri svo erfitt að hætta vegna þess að það sé of auðvelt að blekkja konur."

Sundet fór af landi brott með 350 þúsund krónur sem hann fékk að láni hjá konunni. „Ég geri mér grein fyrir því að ég fæ þetta mjög líklega aldrei bætt. En ef þetta varð til þess að sporna við frekari glæpum, þá er það þess virði," segir hún.

Amund Sand saksóknari segir málið umfangsmikið. „Brotin ná tíu ár aftur í tímann, en fyrir barðinu á manninum urðu bæði konur, karlar og fyrirtæki," segir Sand. „Sundet átti ekki fastan samastað og hélst ekki í vinnu sökum áfengis- og fíkniefnavanda. Hann gisti bara hjá þeim konum sem honum hentaði hverju sinni."

Sand krefst þess að Sundet verði dæmdur til sjö til tíu ára fangelsis-vistar.

sunna@frettabladid.is