Vilja að ríkisstjórnin grípi strax til aðgerða fyrir heimili og fyrirtæki

Framsóknarflokkurinn leggur áherslu á að ríkisstjórn Íslands grípi þegar til almennra aðgerða til að leysa vanda heimila og fyrirtækja.

Haustfundur þingflokks og landsstjórnar Framsóknarflokksins var haldinn í gær í Vík í Mýrdal. Í samþykkt fundarins kemur fram að framsóknarmenn hafi í nærri tvö ár talað fyrir róttækum aðgerðum fyrir heimili og fyrirtæki. Fljótvirkasta og réttlátasta leiðin sé sú að leiðrétta skuldir heimila og fyrirtækja ásamt því að setja þak á verðtryggingu og afnema hana síðan í áföngum.

Framsóknarmenn segja að örvænting fólks sé mikil enda uppboð hafin á heimilum þúsunda fjölskylda. Óásættanlegt sé að fjölskyldum og fyrirtækjum sé haldið í skuldafangelsi á sama tíma og stjórnvöld hækka skatta og skerða bætur og þjónustu.

Framsóknarmenn segja að samvinna um þessi bráðaverkefni sé forsenda þess að árangur náist. Framsóknarflokkurinn sé tilbúinn í slíka samvinnu.