Teddi og Elvis 75 ára í dag

„Hann drakk mikið og át mikið af lyfjum en ég hætti fyrir 25 árum. Þess vegna lifi ég og hann er dauður,“ segir listamaðurinn Teddi, eða Magnús Th. Magnússon.

Hann á 75 ára afmæli í dag, rétt eins og rokkkóngurinn Elvis Presley, hefði hann lifað. Milljónir Elvis-aðdáenda ætla að fagna afmælinu víða um heim, þar á meðal í heimaborg hans Memphis. Hér heima heldur Teddi sína eigin afmælisveislu á vinnustofu sinni í Arnarholti á Kjalarnesi á morgun þar sem íburðurinn verður líklega heldur minni. Kökur, rauðvín og kaffi verður í boði fyrir fólk sem vill kíkja í heimsókn og þrátt fyrir tengslin við hinn fallna rokkkóng býst Teddi ekki við því að slagarar með Elvis verði á fóninum.

„Nei, ég er ekkert ógurlega mikið fyrir hann. Ég var það þegar ég var töffari en ég er orðinn gamall maður núna,“ segir hann og hlær. „En hann var svona viðmið þegar ég var að ná áttum.“

Teddi hefur verið duglegur við að selja timburskúlptúra sína í gegnum árin en annað hvert ár heldur hann sýningu í Perlunni við góðar undirtektir. Hann segist eiga nóg af timbri á vinnustofu sinni. „Ég á timbur út þessa jarðvist og hálfa þá næstu. Margir sem renna og búa til hitt og þetta koma til mín og fá alltaf gefins helling af þessu. Ég á alltof mikið af timbri.“

Hann segir að verk sín hafi lækkað í verði vegna efnahagsástandsins. „Núna eru breyttir tímar og það er mikil harka í þessu. Margir listamenn líta svo stórt á sig að þeir festast í þessu. Jafnvel í dag þá breyta þeir ekki neitt og selja ekki neitt heldur,“ segir afmælisbarnið. - fb